懷孕除了帶來新生命,亦會為媽媽帶來好處

懷胎整整十個月當中,最不乏嘅就係孕吐、腰酸骨痛、腳抽筋、水腫等等 ಥ_ಥ 雖然有唔少辛酸事,但係相信對大多數媽媽嚟講,大肚仍然係件令人感到喜悅同期待嘅事, 除咗屋企即將會有新成員加入,標誌住妳準備踏入人生另一階段,其實懷孕對媽媽身體都有好多好處㗎(・・?)   有咗BB嘅最大好處就係媽媽會更著重自己嘅健康 平時返工咁忙咁攰,得閒都寧願喺屋企抖下或者見下朋友,會抽時間去做身體檢查真係少之又少, 但係陀咗阿B之後就要定期做產前檢查,有醫生密切嘅關注仲點敢鬆懈,一定要盡可能健康(о´∀`о) 就算冇醫生督促住都好,好多媽媽都仍然會將健康放喺首位, 病咗嘅話傳染到BB點算,莫講話而家仲要有疫情, 所以媽媽普遍都會養成良好嘅生活習慣,而BB都可以喺健康環境中成長(๑・̑◡・̑๑) 要培養一個習慣平均要用66日,而妳由驗到有BB嗰刻開始堅持呢個好習慣嘅話,咁其實就已經遠遠超過66日啦~ 雖然BB出世之後,呢個習慣可能就變得岌岌可危,但唔緊要㗎, 當你已經有呢個意識同埋BB都開始唔再日夜顛倒,你就可以同BB一齊重新建立返一個良好嘅生活習慣💕   懷孕可以減低卵巢癌嘅風險 卵巢癌係香港女性十大癌症中以發病率排行,佔第六位ಠ_ರೃ 雖然科學家到而家都未好確定卵巢癌嘅主因係乜嘢,不過就認為患癌風險嘅高低係同賀爾蒙、排卵次數、有無生過BB同月經史等等有關。 按推斷係因為卵巢keep住每個月排卵係會過勞的,而且每次排卵之後卵巢都會經歷受傷再修補再受傷嘅loop (;´༎ຶД༎ຶ`) 而懷孕就啱啱好可以畀卵巢休息下💤 之後餵埋母乳都可以降低風險添,因為餵奶賀爾蒙會抑壓排卵, 有研究顯示如果媽媽持續一年或以上都餵人奶,可以大幅降低唔止係卵巢癌,仲有乳癌發生😳   生完小朋友之後M痛消失咗 有啲媽媽喺生完BB之後會發現一個明顯嘅生理改變就係再唔會M痛(°▽°) 呢個對於一直受M痛影響嘅媽媽絕對係好消息,而妳就係嗰大約10%入面其中之一嘅幸運兒🤩 要先講講M痛係分2種:原發性經痛類型同繼發性經痛,而呢個現象亦只會出現喺有原發性經痛類型嘅女性身上٩(๑❛ᴗ❛๑)۶ 因為生BB之前,由於子宮頸比較狹窄,子宮收縮就容易經痛;而生BB之後撐大咗子宮同子宮頸,嚟M嘅時候子宮不再過度收縮,經血排出比較順暢,咁就自然唔會再痛喇~   有咗BB提升自信心同增加好心情   一定會有人喺度諗: 「點會啊?!懷孕會令女人體型改變、身體黑色素沉澱,仲可能生好多雀斑、粉刺、暗瘡等添,應該大多數大肚婆都會覺得自己變肥變醜,點會提升自信心啊?」Σ(-᷅_-᷄๑) 但其實唔係咁㗎(。ì _ í。) 懷孕意味住新生命嘅到來,呢種期待會令媽媽內心產生幸福感,令媽媽充滿母性嘅光彩, 而咁樣嘅好心情就會影響一個人所散發出嚟嘅感覺,無形中提升媽媽嘅自信心,令媽媽睇起上嚟容光煥發✨   生BB對媽媽嚟講有唔同嘅好處,而呢啲好處都只不過係bonus嚟, 同媽媽講呢啲嘅出發點都只係唔想媽媽覺得懷孕係件折磨自己嘅事( T_T)\(^-^ ) 希望妳可以好好享受懷孕呢段只係屬於妳同BB嘅專屬時光, 準備好自己嘅心態嚟迎接新生命嘅到來(⁎⁍̴̛ᴗ⁍̴̛⁎)  
2022-09-07

大肚媽媽的禁忌?百無禁忌~~

相信唔少媽媽喺啱啱驗到有咗嘅時候,都可能會諗: 「我早幾日有冇做啲咩食咗啲咩係對BB唔好㗎呢?」 「人地話有咗BB唔可以抱其他BB,但我尋日先抱完ʕʘ‿ʘʔ」 「阿媽話有咗唔去得婚禮,但好朋友下個月結婚,而我都真係好想去(● ˃̶͈̀ロ˂̶͈́)੭ꠥ⁾⁾」   除咗唔可以抱其他BB👶🏻,唔可以去人地婚禮之外,仲有好多其他唔同關於孕媽咪嘅禁忌,到底點解會有咁多禁忌嘅?   以前科技無咁發達,無人知BB喺媽媽肚入面嘅情況係點, 所以生完BB之後,BB有咩問題就會追溯返媽媽大肚期間做過啲咩,食過啲咩先會出現呢個情況。 久而久之,呢啲結論就一直流傳到而家,成為睇起嚟無乜科學根據嘅禁忌。 不過去到今時今日,超聲波變得普及,見到BB係媽媽個肚入面係點, 見得到BB嘅手手腳腳,咁樣就會明白有啲禁忌只不過係禁忌luuu   當中都有唔少好有趣好得意嘅禁忌,唔知你有冇聽過呢~ 例如係 「用針線會令到BB嘅眼同嘴縫埋一齊」、 「用較剪會令BB有兔唇🐰」、 「綁嘢會令BB十指不全」, 會有呢類講法出現,除咗可能係由追溯媽媽嘅行為而生,妳又有冇覺得佢哋就好似細細個成日聽嘅: 「講大話會甩大牙🦷」、 「食剩飯粒第時就會嫁豆皮老公」、 「裝人沖涼會生眼挑針」? 屋企嘅長輩咁講都係想嚇下你,令到你唔會做呢啲事。 畢竟喺當時男耕女織、多勞多得嘅社會下,女性都有好多嘢做㗎,會有咁嘅講法都係想媽媽抖多啲!   以「想媽媽抖多啲」作為出發點,就會明白好多唔同禁忌喺點嚟╰(*´︶`*)╯♡ 以啱啱提到唔去得婚禮為例,舊時候嘅婚宴場合難免會放炮仗、打鑼打鼓,再加上衛生環境冇咁好,腸胃炎已經係一個好嚴重嘅病嘅話, 先唔好理「喜沖喜」呢樣嘢,孕媽媽就當然唔好出席比較好。 如果要套落而家嚟講,就會係戶外婚禮的話,天氣太熱會容易中暑,去酒店搞就冷氣好大容易凍親, 不過照咁嘅講法,就算冇疫情,睇怕孕媽媽都只可以留喺屋企 (地球好危險㗎,你返火星啦☄️)   無論孕媽媽信唔信呢啲禁忌都好,禁忌唔會貿貿然彈咗出嚟(・ω・) 只要知道佢咃嘅由來就會明白佢咃唔係一面倒嘅錯,只不過係矯枉過正,或者係演繹方式唔同。 例如係唔好抱人地BB、唔好搬屋,呢2個就等同叫孕媽媽唔好拎重嘢一樣, 都係怕孕媽媽太過操勞,然後再加啲阻嚇元素,想令孕媽媽更加聽入耳, 只不過而家就變得有少少斬腳趾避沙蟲嘅感覺(つД`)ノ 更重要嘅係, 只要我哋諗深一層,就會明白無論係邊一代人,大家都係為孕媽媽同BB着想~  
2022-09-07

再忙,也別忘了產後回診,畢竟,照顧自己也是產後相當重要的事

陀咁咁耐,終於順利「卸貨」,辛苦曬! 隨之而嚟嘅,就可能係哺乳同照顧BB嘅考驗,媽媽們要繼續加油,一次生兩次熟,妳應付到㗎 ٩(˃̶͈̀௰˂̶͈́)و 不過一開始再手忙腳亂,都唔好唔記得產後覆診,檢查妳嘅身體復原情況喔!   生BB之後身體各器官開始恢復到懷孕前嘅狀態,呢段時間稱為 「產褥期 」, 一般都要6個禮拜,期間嘅護理都唔可以忽視㗎。 生完6個禮拜之後就要檢查一次,睇下身體係咪完全復元(⁎⁍̴̛ᴗ⁍̴̛⁎)   🙋🏻‍♀️產後檢查會check啲咩? 首先會有檢查傷口復原情況,順產嘅媽媽就會睇下會陰傷口癒合情形, 雖然生完一個禮拜之後表面傷口就已經癒合,但整個傷口都要成4至6個星期先叫做真正好返, 而開刀嘅媽媽有啲可能係出院前拆線,但都有可能係之後拎拆線紙去拆線, 但都會一樣會檢查傷口嘅,記得沖涼之後用毛巾抹乾傷口,減少發炎機會。 除咗檢查傷口,仲會有檢查子宮收縮情況,睇下有冇恢復到原本嘅位置同大小。 另外,亦會檢查小便係唔係有蛋白尿、惡露係咪已經排清等等,有媽媽餵哺母乳就會檢查乳房有冇發炎。   一連串嘅檢查後,妳以為就完?Nonono_(┐「ε:)_ 產後由於荷爾蒙嘅變化、擔心自己無法勝任母親角色、同老公溝通得唔好、每晚都睡唔好、奶水唔夠bb食唔飽等等一大堆因素, 都會令到媽媽生完2星期內,成日覺得憂鬱嘅情況出現,所以通常覆診,都會評估埋妳嘅心理狀態◉‿◉ 媽媽嘅心理變化,當然都係檢查嘅重點,畢竟,有快樂嘅媽媽,先會有快樂嘅BB嘛~ 另外,絕大多數媽媽孕期間都唔會做子宮頸抹片檢查,所以生完之後都應該進行抹片檢查同HPV檢查(*¯︶¯*) 本身抹片檢查喺25歲起就應該要定期做,最好一年一次。如果媽媽未打HPV疫苗,都應該趁產後6個月呢個好時機去打💉 雖然話愈早打愈好,但生咗小朋友先打都唔會話太遲㗎!   進行產後覆診,都係為咗確保媽媽產後生心理都健健康康💕 要提醒嘅係,如果妳嘅傷口有異樣(例如係會陰傷口有輕微紅腫或裂開/腹部傷口有紅、腫、痛、熱或有液體滲出)、 惡露明顯多咗仲有惡臭或出現發燒同下腹痛、尿頻和小便赤痛(因為生完BB都容易有尿道炎),都要快啲去睇醫生🩺 無論點都要記住好好照顧自己,請各位媽媽們千祈唔好忙到忽略咗產後覆診, 一出院就記得打去母嬰健康院預約,約咗期記得mark低喇🗓  
2022-09-07

BB一接觸奶樽後就移情別戀愛上了奶樽餵,想再親餵都無法成功?

乳頭混淆係指BB係接觸過奶嘴之後,再去吸媽媽嘅乳頭時,會因為感覺唔同而產生混淆、唔願接受嘅情況😭 細個要作文,想表達「用盡全力」多數會寫成「使出吃奶的力氣」, 就係指BB啜奶奶嘅時候係要用力,但奶嘴嘅設計係會令BB啜嘅時候唔洗用太多嘅力氣就飲到奶。 相比之下,啜媽媽乳頭會費力啲,又要擘大啲個口, 所以用過奶嘴嘅BB,可能用唔夠力同埋唔啱嘅方式去啜奶頭,當佢發現啜唔出奶水,就可能會喊到拆天,甚至係放棄吸吮。   如果媽媽係全親餵,身體會根據BB需求自然調節泌乳量,同時都會令媽媽產生幸福感,亦都唔使擔心發生乳頭混淆嘅問題,而且最容易達到供應平衡嘅狀態。 不過都有媽媽一開始係用奶樽餵嘅方式,或者重回職場嘅時候,想日頭用奶樽,夜晚埋身餵, 就好有可能會遇到BB乳頭混淆、唔肯啜奶嘅情況。 因為BB已經習慣咗用奶樽,再去接觸媽媽嘅乳頭時,又好易會唔滿意,覺得啲奶水出得唔夠多唔夠快,甚至漸漸會因為唔熟悉而唔知點樣去啜 _(┐「ε:)_   要去改善乳頭混淆嘅問題,挽回BB嘅心,其實都可以喺以下呢幾方面入手嘅💕   第一,唔好等到BB好肚餓嘅時候先餵奶。 有啲媽媽可能會以為當佢好餓嘅時候,會因為冇得揀而迫不得已咁吸媽媽嘅奶,但其實呢個做法係唔好㗎(◞‸◟) BB肚仔餓嘅時候,反而容易大哭大鬧,而且非常難以安撫,喺情緒激動之下,口腔同舌頭都會變得僵硬,就好易會用錯嘅方法去啜奶奶。 當遇到呢個情況嘅時候,媽媽好多時都會直接放棄,怕餓親BB嘛。 所以想令BB同媽媽嘅乳頭和好如初,就要避免喺BB情緒唔好或者哭鬧嘅時候餵奶,畢竟心情差嘅時候就會睇咩都唔順眼嘛 (╯‵□′)╯︵┻━┻   第二,唔好強迫BB吸奶。 BB唔肯吸媽媽嘅乳房時,一定唔可以用強迫嘅方法逼佢就範,咁樣只會令到佢覺得唔舒服,對媽媽嘅乳房留低唔好嘅印象。 媽媽可以先準備好一樽奶,當BB唔肯啜乳頭嘅時候,就俾佢用奶樽飲一啲先,然後再試吓俾佢啜返乳頭。 當BB先得到啲甜頭,肚仔冇咁餓,咁就容易啲傾掂數喇( ´∀`)   第三,令BB愛上媽媽埋身餵。 當BB享受媽媽親餵,先可以慢慢咁淡忘用奶樽飲奶嘅時光。 媽媽可以試下計啱BB差唔多要飲奶嘅時間,提早半個鐘抱住佢咁培養情緒。 記得要打開張包被,令BB喺放鬆嘅狀態下,抱住佢貼住媽媽嘅心口,慢慢咁就會發現BB開始有想啜奶嘅動作。 除咗親餵嘅時候,平時都可以多啲咁做,當BB愈黎愈熟媽媽嘅乳房,就可能令媽媽喺埋身餵嘅時候愈黎愈少阻礙~   第四,當BB啜奶嘅同時用手擠奶。 BB唔鍾意親餵嘅其中一個原因,可能就係覺得用奶樽飲可以飲得快啲、慳力啲, 所以建議媽媽不妨喺BB吸奶嘅時候,用手喺乳房下緣幫手加壓擠奶,當奶流量變大時,BB啜嘅時候就會開心啲,慢慢就會愛上親餵luuuu   第五,確認BB啜奶嘅方式係正確嘅。 BB啜奶時,個嘴仔會擘得好大,幾乎係含住媽媽整個乳暈,每吸兩三啖就會聽到呑嚥嘅「咕嚕」聲,如果BB啜嘅方式唔啱,就會有「嘖嘖」聲,好似漏風嘅聲咁🌬  
2022-09-07

找出適合彼此的哺乳方式,才能讓寶寶吸得開心,媽媽也餵得輕鬆

BB一日要飲幾次奶,每次都飲半個鐘以上,如果餵奶方式唔適合,唔單止BB覺得唔舒服,媽媽都會覺得腰酸背痛(;´༎ຶД༎ຶ`) 而一般常見嘅餵奶姿勢就有五種,分別係欖球式、修正欖球式、搖籃式、側躺式同埋生物性哺乳法。   欖球式: 就係指媽媽好似喺腋下夾住一個欖球咁,用手臂夾拖住BB嘅雙腳,而BB嘅上半身正對媽媽嘅胸前,可以用枕頭墊高BB,或者用手掌托住BB嘅頭仔同頸。 而喺呢個姿勢下,BB唔會壓到媽媽嘅肚,好適合剖腹產嘅媽媽。   修正欖球式: 同欖球式幾乎一樣,唔同嘅係BB身體會橫過媽媽胸前,吸遠啲嗰邊嘅乳房,即係媽媽用左邊腋下夾住BB,但BB係飲右邊嘅奶。 呢個方式就可以俾媽媽清楚見到BB飲奶飲成點,好啱新手媽媽~   搖籃式: 最傳統嘅餵奶方式,就係用一隻手臂枕住BB嘅頭同頸, 令 BB嘅肚緊貼媽媽嘅胸同肚,形成一直線,喺BB身下墊個枕頭就會再輕鬆啲。   側躺式: 媽媽打側瞓喺度,而BB都同樣側身同媽媽正面緊密相貼,同搖籃式一樣,媽媽都可以餵得輕鬆啲٩(˃̶͈̀௰˂̶͈́)و   生物性哺乳法: 最原始、最自然舒適嘅哺乳方式,呢種方式會以媽媽為中心,媽媽可以平躺或者半躺咁樣,搵出最舒適嘅姿勢同埋角度,放鬆身體咁樣餵奶。 呢個姿勢會令到BB嘅面緊貼媽媽嘅胸,兩個人嘅肚亦都係緊貼嘅。 由於媽媽嘅乳暈上面有蒙哥馬利腺,會散發出類似羊水嘅氣味,加上呢個姿勢亦都俾BB聽到媽媽嘅心跳聲。 對啱啱出世嘅BB嚟講,呢啲都係最熟悉嘅味道同埋聲音,可以増加BB嘅安全感,亦都穩定情緒,埋身餵亦都會順利啲。   至於塞奶(乳管阻塞)嘅話, 媽媽可以喺餵奶嘅時候令BB嘅下巴頂住硬塊,例如硬塊喺乳房外下側,就適合用欖球式嘅姿勢。 令到BB下巴掂住硬塊,會將下方嘅乳腺管撐直啲,加上BB啜緊嘅時候下巴就不斷郁,等於係幫媽媽按摩,咁就可以幫到媽媽令硬塊消失。   無論用邊一種姿勢,記住都需要良好嘅支撐,媽媽嘅手同身體唔會覺得吃力先得。 同樣地,都無話邊一種姿態先係最正確嘅,關鍵在於媽媽同BB都覺得舒服,呢一點係最最最重要! 就算姿勢標準,但成身繃緊咗,抱BB嘅時候處於僵硬嘅狀態之下,BB都同樣難受㗎(´°̥̥̥̥̥̥̥̥ω°̥̥̥̥̥̥̥̥`)  
2022-09-07

BB行為解密——放聲大哭 (上)

「每次BB一喊就抱,就會寵慣咗佢」 「BB喊就去抱佢,佢就會喊得更厲害,BB嘅自我表達能力都會降低」   其實BB會喊係有原因嘅,所以當佢哋喊嘅時候,最優先做嘅,就係幫佢哋解決面對緊嘅問題 ٩(˃̶͈̀௰˂̶͈́)و 只要問題解決咗,BB自然就唔會再喊~ 而呢一個過程係好重要!!! 因為咁樣係可以令BB產生信任感,佢哋會信爸爸媽媽或者照顧者係會喺自己唔舒服嘅時候出現,唔需要聲嘶力竭好似叫救命咁叫爸爸媽媽過嚟,唔洗咁大聲都會有人嚟幫手同埋陪自己(˶‾᷄ ⁻̫ ‾᷅˵)   畢竟啱啱出世嘅BB唯一可以同你講嘢嘅方式就係喊,係一種本能需要。 佢哋仲未識得嗲人,唔使擔心會縱壞佢哋🙈 反而抱下佢哋可以滿足佢哋嘅需要,令佢哋感受到你嘅關注,增加安全感,咁樣除咗可以令BB第時EQ高啲,仲可以鞏固親子感情💕 遲啲可能係你想抱,佢哋唔想你抱lu (;´༎ຶД༎ຶ`)   其實唔止係EQ㗎, 美國有兩間大學都就呢樣嘢做咗啲研究,發現如果媽媽喺BB出生幾個月之後,有積極回應BB喊嘅時候所表達嘅訴求, 佢哋嘅語言、認知、社交等等能力都會發展得更好更強∑(゚Д゚) 而且媽媽都唔使擔心BB會因為成日得到父母關注同抱抱而過度依賴,佢哋反而會有更健康嘅心理狀態添~ 爸爸媽媽多啲抱下BB,令佢哋確實咁感受到你哋嘅愛,係有利佢哋嘅長遠成長同發展🧠   所以幾時都話母愛/父愛真偉大,最最重要嘅係愛要說出口,令BB接收到感受到先得嘛,而家就錫返啖先喇 ♪(´ε` )  
2022-09-07

BB行為解密——放聲大哭 (下)

上次就講到BB喊嘅時候,最應該做嘅係幫佢哋解決面對緊嘅問題,令佢哋知道自己唔係得自己一個,感受到你嘅關心,增加安全感~而今次,我哋就一齊試下詮釋BB嘅喊聲喇(˶‾᷄ ⁻̫ ‾᷅˵) 喺詮釋之前,講一個有關BB喊嘅冷知識畀大家知: BB喊嘅時間會隨住年齡改變,大約兩星期大嘅BB每日平均喊1.75小時;去到六星期大就會達到高峰,每日平均喊2.75小時。 你以為人愈大喊得愈少?Nono!😳   而大部分嘅BB一瞓醒,通常就會「嗚哇」咁樣喊出嚟。 BB喊表示佢有嘢想講,所以BB一瞓醒就喊就係佢一瞓醒就有嘢想同你講: 「我瞓醒你哋都無人理我嘅٩(๑`^´๑)۶//」 「點解咁熱或者咁凍㗎(ㆀ˘・з・˘)」 「片片有嘢令到我好唔舒服呀你睇下有啲咩(´°̥̥̥̥̥̥̥̥ω°̥̥̥̥̥̥̥̥`)」 「我瞓醒肚仔餓要飲奶奶呀ಥ_ಥ」 等等。   所以BB喊嘅原因不外乎係身體唔舒服、肚仔餓或者想屙pooppoop等等。 畢竟對BB而言,所有問題都係大問題,會大喊係好合理,所以唔使太擔心, 只要聽到BB喊嘅時候,諗下BB上一餐係幾時食?食得多唔多?睇下片片有冇濕?摸下BB有冇出曬汗定凍凍哋? 再加上爸爸媽媽照顧多幾日,就會更加捉摸到BB嘅習慣,慢慢就可以更得心應手咁幫佢解決問題🥳   但係有時明明BB已經食飽,片都換埋,點解都仲係喊嘅😵‍💫 咁可能BB只係純粹空虛寂寞凍,只係想要人氹下呵下(๑・̑◡・̑๑) 但係氹BB都係一大學問嚟~ 有時坐喺度氹,BB都係會繼續喊,但一企起身氹佢就唔再喊,咁係因為BB被媽媽抱住嘅時候,更貼近媽媽嘅心臟, 比起坐喺大髀上面,媽媽嘅心跳會接近孕期時嘅心跳,所以BB聽到呢個心跳聲嘅時候,會覺得好似返到媽媽肚子入面咁,自然更有安全感,唔會再喊啦💕   但係企得耐都會攰,想坐低用一個舒服啲嘅姿勢去氹BB又可以點呢🧐 媽媽可以試下一開始企喺度抱起BB安撫下先,等佢冷靜落嚟之後,再換一個自己舒服嘅姿勢。 最重要係慢慢嚟,唔好BB一喊完就即刻坐返低,而係要由企喺度嘅姿勢,好慢好慢咁愈坐愈低,直至媽媽覺得舒服為止٩(˃̶͈̀௰˂̶͈́)و 當媽媽坐低咗之後,BB都已經冷靜落嚟,咁樣就算媽媽換姿勢,佢都唔會喊唔停。 如果屋企空間夠大,可以放得落一張搖籃椅,咁就更加方便,通常抱住BB係搖籃椅係凳上面搖一陣,BB就會比較平靜,媽媽亦都夠曬舒服啦(*¯︶¯*)   👨🏻🧑🏻記唔記得上次文章嘅開始,就係有唔同嘅人對於BB喊嘅時候有唔同嘅意見? 但其實爸爸媽媽唔需要因為身邊嘅人講左某啲野而感到有壓力,因為最熟悉BB嘅人係你,只有你對BB喊聲嘅詮釋先係最準確,其他人嘅講法僅供參考~  
2022-09-07

要求孕婦「不要擔心」是很難的事,但妳一定要相信孕期開開心心,胎兒會更健康

心理影響生理,懷孕中嘅你,就更加唔可以輕忽情緒嘅影響。   大家都話有BB係一件喜事,但係陀B過程多少都有啲辛酸: 「懷孕初期孕吐嘔到七彩,但就因為未夠三個月要博命掩飾」 「難得去到中期可以話俾親朋戚友知啦,但係個肚唔夠明顯,想坐關愛座但又唔敢坐」 「話就話孕吐嘅情況舒緩咗,但就有其他狀況出現,就好似係體溫變高令到個人好吸蚊,嚴重便秘、腰酸背痛、產生妊娠紋、體重增加、全身水腫、腰圍變粗、皮膚暗沉」 (媽媽真係好偉大😭😭) 「有好多人關心,叫你唔好做呢樣做嗰樣,都唔知應該聽邊個講好」   懷孕期間身體上面嘅變化,加上心理壓力,令到孕婦身心都背負着沉重嘅負擔。 冇人可以代替你承受呢啲痛苦,咁既然現實改變唔到,就試吓改變自己嘅諗法,搵返開心快樂嘅生活(˶‾᷄ ⁻̫ ‾᷅˵)   而身邊嘅人,如果想避免造成孕媽媽不必要嘅壓力, 盡量唔好用一啲尖銳、命令式嘅口吻,同埋都唔好用威脅同埋恐嚇嘅方式表達你嘅「關心」。   另外都想建議所有嘅孕媽媽,如果可以的話就多啲出街行吓曬吓太陽咁, 「光照治療」本身就係治療抑鬱症嘅其中一個方法,對你嘅心情都會有幫助。   懷孕的確好辛苦,變得容易喊、容易嬲,但都容易笑咗。 換過角度諗,呢一生人可能頂多得兩三次呢啲機會,不如試吓享受呢一啲變化, 保持愉快心情同幽默感看待眼前發生嘅一切,同各種情況和平共處,好好珍惜懷胎嘅呢十個月 ٩( 'ω' )و  
2022-09-07

正視維他命D的重要,絕對有益妳和BB的健康

維他命D係非常重要但成日都被忽略嘅營養素,對孕婦同正值哺乳期嘅媽媽尤其重要!   對孕婦而言,佢嘅作用唔止係強化骨骼(身體要有維他命D先吸收到鈣㗎~), 維他命D可以降低早產、流產、妊娠糖尿、妊娠毒血症、胎兒過輕等風險, 所以喺孕期額外攝取維他命D,避免妊娠併發症嘅發生。   對於埋身餵奶嘅媽媽而言,BB由媽媽身體獲得維他命D嘅儲備有限,出世之後,就要由陽光、母乳同食物中攝取。 即使母乳係BB最理想嘅食物,BB喺母乳中得到嘅維他命D就唔多,如果媽媽本身都唔夠維他命D,咁BB得到嘅就更加少, 2018年就有研究指出香港BB嘅維他命D不足嘅情況好普遍 (;´༎ຶД༎ຶ`)   講到要補充維他命D,就要明白咗維他命嘅定義:一種少量嘅營養素,而且人體又唔識自行合成,一定要透過外在途徑嚟補充。 補充維他命D嘅最好方法就係正午時候曬10至15分鐘太陽,記得係要唔採取任何防曬措施,人體先可以真正自行產生維他命D。 明明本身唔識合成,但曬下太陽就由唔識變識,真係幾奇妙,再配合埋而家嘅天氣,維他命D get! 立即變黑 get! 中暑 get!   唔曬太陽,咁就只可以喺日常飲食上或者食營養補充品喇, 不過其實好少食物本身就有維他命D,天生就有維他命D嘅,就例如三文魚沙甸魚吞拿魚呢啲油脂較高嘅魚、蛋黃、肝臟等。 不過市面上都有添加維他命D嘅食物,但單靠食物來源一般唔能夠滿足所需, 所以可能食營養品會係最直接簡單嘅方法,記得要小心揀取營養品,唔放心嘅話,最好都係問下醫生喇ʕ•ᴥ•ʔ  
2022-09-07